Avqustun 23-də Daşkənddə Azərbaycan Respublikasının Prezidenti İlham Əliyev və Özbəkistan Respublikasının Prezidenti Şavkat Mirziyoyev mətbuata bəyanatlarla çıxış ediblər. Dövlət başçıları Azərbaycan–Özbəkistan münasibətlərinin hazırkı səviyyəsini yüksək qiymətləndirərək əməkdaşlığın gələcək istiqamətləri barədə fikirlərini bölüşüblər.
Özbəkistan Prezidenti Şavkat Mirziyoyev Azərbaycan Prezidentinin Özbəkistana dövlət səfərinin tarixi əhəmiyyət daşıdığını bildirib. O, səfər çərçivəsində Əbədi dostluq haqqında Müqavilənin imzalanmasını xüsusi qeyd edərək iki ölkə arasında münasibətlərin qarşılıqlı etimada, ortaq tarixi köklərə, çoxəsrlik dostluğa və mənəvi dəyərlərə əsaslandığını vurğulayıb.
Danışıqlar zamanı siyasi dialoqun gücləndirilməsi, parlamentlər, hökumətlər və regionlar arasında əlaqələrin genişləndirilməsi, eləcə də ticarət, sənaye, energetika, nəqliyyat və mədəniyyət sahələrində əməkdaşlığın inkişafı əsas müzakirə mövzularından olub. Tərəflər əmtəə dövriyyəsinin 1 milyard dollara çatdırılması imkanlarını da nəzərdən keçiriblər.
Nəqliyyat və tranzit sahəsində əməkdaşlığa da xüsusi diqqət ayrılıb. Trans-Xəzər dəhlizinin potensialının birgə inkişaf etdirilməsi, logistika imkanlarının artırılması və Xəzər dənizində birgə donanmanın yaradılması istiqamətində işlərin fəallaşdırılması nəzərdə tutulur.
Prezident İlham Əliyev bəyanatında Azərbaycanla Özbəkistan arasında münasibətlərin möhkəm mənəvi və iqtisadi təməl üzərində qurulduğunu bildirib. Dövlətimizin başçısı enerji, nəqliyyat, investisiya, turizm, dağ-mədən, avtomobil sənayesi, kənd təsərrüfatı və emal sektorları daxil olmaqla əməkdaşlığın geniş istiqamətləri əhatə etdiyini diqqətə çatdırıb.
Prezident İlham Əliyev Özbəkistanın Qarabağın bərpasında iştirakını da yüksək qiymətləndirib. Füzulidə Mirzə Uluqbəy adına 960 şagird yerlik məktəbin tikintisini və Xankəndidə tikiş fabrikinə yatırılan investisiyaları iki ölkə arasındakı qardaşlıq münasibətlərinin əməli ifadəsi kimi qeyd edib.
Bəyanatlardan bir daha aydın olub ki, Azərbaycan və Özbəkistan arasında münasibətlər siyasi dialoqla yanaşı, iqtisadiyyat, investisiya, nəqliyyat, enerji və humanitar sahələrdə konkret layihələrlə daha da möhkəmlənir və iki qardaş ölkə arasında əməkdaşlıq yeni inkişaf mərhələsinə qədəm qoyur.