3 Aprel 2025, Cümə axşamı
Babək Rayon Mədəniyyət Sarayında 8 Mart - Beynəlxalq Qadınlar Günü münasibətilə şəhid anaları və rayonun ictimai həyatında fərqlənən qadınların iştirakı ilə tədbir keçirilib.
Əvvəlcə Ulu Öndər Heydər Əliyevin və ərazi bütövlüyümüz uğrunda canlarından keçən şəhidlərin əziz xatirəsi bir dəqiqəlik sükutla yad edilib.
Babək Rayon İcra Hakimiyyətinin başçısı Ovni Muradov tədbirdə çıxış edərək qeyd edib ki, Azərbaycan qadını milli-mənəvi dəyərlərimizin qorunub saxlanılmasında və nəsildən-nəslə çatdırılmasında daim fədakarlıqlar göstərmiş, xalqımızın hazırkı mədəni simasının müəyyənləşməsində müstəsna rol oynamışdır. İcra başçısı şəhid analarına və xanımlarına, döyüşlərdə sağlamlığını itirmiş hərbçilərin ömür-gün yoldaşlarına, xalq üçün layiqli oğullar böyüdən əsgər analarına ən xoş arzularını çatdırmışdır.
Fəal qadınlar adından çıxış edən Şıxmahmud kənd tam orta məktəbinin direktoru Məhəbbət Rəsulova muxtar respublikada qadınların analıq vəzifəsini və borcunu şərəflə yerinə yetirdiyini, onların xalqımızın gələcəyi üçün ailə dəyərlərimizin qoruyucuları, adət-ənənələrimizin yaşadıcıları olan, nəsillər arasında varisliyi ləyaqətlə davam etdirən övladlar tərbiyə etdiyini diqqətə çatdırmışdır.
Sonra Babək Rayonunda müxtəlif peşə sahələrindən olan aktiv qadınlara fəxri fərmanlar dəyərli hədiyyələr təqdim edilmişdir.
Sonda tədbirin bədii hissəsi baş tutmuş, Babək Rayon Mədəniyyət İdarəsinin kollektivi və Babək rayon uşaq musiqi məktəblərinin kollektivlərinin çıxışı olmuşdur.
 |
 |
 |
 |
 |
 |
