15 İyun – Milli Qurtuluş Günü münasibətilə Babək rayonunda silsilə tədbirlər keçirilib.
Əvvəlcə rayon mərkəzində yerləşən Ümummilli Lider Heydər Əliyevin abidəsi ziyarət olunub. Babək Rayon İcra Hakimiyyətinin rəhbərliyi, Naxçıvan Muxtar Respublikası Ali Məclisinin deputatları, idarə və müəssisələrin rəhbərləri, ictimaiyyət nümayəndələri və gənclər abidə önünə gül dəstələri düzərək Ulu Öndərin əziz xatirəsini dərin ehtiramla yad ediblər.
Abidə önündə çıxış edənlər Ümummilli Lider Heydər Əliyevin Azərbaycan dövlətçiliyinin möhkəmləndirilməsi, müstəqilliyimizin qorunması və ölkəmizin inkişafı istiqamətində göstərdiyi misilsiz xidmətləri minnətdarlıq hissi ilə xatırlayıblar.
Daha sonra Babək Rayon Mədəniyyət Sarayında 15 İyun – Milli Qurtuluş Gününə həsr olunmuş tədbir keçirilib. Tədbir Azərbaycan Respublikasının Dövlət Himninin səsləndirilməsi ilə başlayıb. Ardınca Ümummilli Lider Heydər Əliyevin və Azərbaycanın ərazi bütövlüyü uğrunda canlarından keçmiş şəhidlərin əziz xatirəsi bir dəqiqəlik sükutla yad olunub.
Tədbirdə çıxış edən Babək Rayon İcra Hakimiyyətinin başçısı Ovni Muradov bildirib ki, 15 İyun – Milli Qurtuluş Günü Azərbaycan dövlətçilik tarixinin ən mühüm səhifələrindən biridir. Qeyd olunub ki, 1993-cü ildə xalqın təkidli tələbi ilə hakimiyyətə qayıdan Ümummilli Lider Heydər Əliyev ölkədə hökm sürən siyasi böhranı aradan qaldıraraq sabitliyin bərqərar olunmasına, dövlət müstəqilliyinin qorunmasına və müasir Azərbaycan dövlətinin möhkəm təməllər üzərində qurulmasına nail olub.
Vurğulanıb ki, Ulu Öndərin müəyyənləşdirdiyi inkişaf strategiyası bu gün Prezident İlham Əliyevin rəhbərliyi ilə uğurla davam etdirilir, ölkəmiz beynəlxalq aləmdə nüfuzunu daha da artırır, sosial-iqtisadi inkişaf sahəsində mühüm nailiyyətlər qazanır.
Tədbirdə çıxış edən digər natiqlər də Milli Qurtuluş Gününün Azərbaycan dövlətçiliyinin xilasında və möhkəmlənməsində müstəsna rol oynadığını qeyd edərək, bu tarixi günün xalqımızın taleyində dönüş nöqtəsi olduğunu bildiriblər.
Tədbirin bədii hissəsində Babək Rayon Mədəniyyət Sarayının kollektivinin təqdimatında vətənpərvərlik mövzusunda musiqi nömrələri səsləndirilib. Konsert proqramı iştirakçılar tərəfindən böyük maraq və alqışlarla qarşılanıb.
Tədbir Milli Qurtuluş Gününün tarixi əhəmiyyətinin bir daha vurğulanması və Ümummilli Lider Heydər Əliyevin əziz xatirəsinə dərin ehtiramın ifadə olunması ilə başa çatıb.
 |
 |
 |
 |