Azərbaycan Respublikasının Prezidenti İlham Əliyev yanvarın 5-də yerli televiziya kanallarına müsahibə verərək ölkənin daxili və xarici siyasətində baş verən mühüm proseslər, əldə olunan nailiyyətlər və qarşıda duran əsas hədəflər barədə fikirlər səsləndirib.Prezident İlham Əliyev bildirib ki, 2025-ci il Azərbaycan üçün siyasi, iqtisadi və diplomatik baxımdan mühüm nəticələrlə yadda qalıb.
Dövlətimizin başçısı xüsusilə vurğulayıb ki, Ermənistan–Azərbaycan münaqişəsinin hərbi mərhələdən sonra siyasi müstəvidə də yekunlaşması və bu prosesin beynəlxalq səviyyədə qəbul olunması ölkəmizin tarixi uğurlarındandır. Prezident qeyd edib ki, Azərbaycan döyüş meydanında qazandığı Qələbəni beynəlxalq hüquq və siyasi platformalarda da möhkəmləndirib.Müsahibə zamanı dövlət başçısı Azərbaycanın xarici siyasət kursuna toxunaraq ABŞ ilə münasibətlərin yeni mərhələyə qədəm qoyduğunu bildirib.
Qeyd olunub ki, 907-ci düzəliş faktiki olaraq gündəmdən çıxarılıb, strateji dialoq mexanizmləri işə salınıb və Azərbaycan regional proseslərdə etibarlı tərəfdaş kimi qəbul olunur. Eyni zamanda, Zəngəzur dəhlizinin açılması məsələsinin artıq beynəlxalq gündəlikdə təsdiqlənmiş mövzuya çevrildiyi diqqətə çatdırılıb.
Prezident İlham Əliyev Azərbaycanın beynəlxalq mövqelərinin möhkəmlənməsindən danışaraq bildirib ki, ölkəmiz Çinlə Hərtərəfli Strateji Tərəfdaşlıq münasibətləri qurub, D-8 İqtisadi Əməkdaşlıq Təşkilatına yeni üzv kimi qəbul edilib və Mərkəzi Asiya Məşvərət Şurasında tamhüquqlu üzv statusu qazanıb. Bu faktlar Azərbaycanın qlobal miqyasda artan nüfuzunun göstəricisi kimi qiymətləndirilib.Dövlət başçısı iqtisadi göstəricilərə toxunaraq vurğulayıb ki, Azərbaycanın xarici borcu ÜDM-in cəmi 6 faizini təşkil edir və ölkənin maliyyə dayanıqlığı təmin olunub.
Müsahibədə Qarabağ və Şərqi Zəngəzurda aparılan genişmiqyaslı bərpa və quruculuq işlərinə də diqqət yetirilib. Prezident İlham Əliyev qeyd edib ki, bu ərazilərdə müasir infrastrukturun qurulması, yaşayış məntəqələrinin bərpası, “yaşıl enerji” layihələrinin həyata keçirilməsi, eləcə də rəqəmsal və süni intellekt əsaslı həllərin tətbiqi dövlət siyasətinin əsas prioritetləri sırasındadır.
Sonda Prezident İlham Əliyev bildirib ki, hazırkı beynəlxalq münasibətlər sistemində güc, milli maraqların qorunması və etibarlı müttəfiqlik əsas amillərdir və Azərbaycan bu prinsiplərə əsaslanaraq müstəqil və balanslı siyasətini davam etdirir.
